Tlaẖowyam kanwei masaika. Naika mamook-peipa kopa masaika.
Tenas-anḵati naika mamook-peipa, pi haiyas saliks okok peipa. Iht man dleit yaka haiyoo-mamook-saliks naika pi wik-saiyaa naika masaachi-wawa yaka kopa okok peipa. Wel, tl’onas mesaika tiki kumtuks poos tilikum mamook kakwa kopa chinook-peipa anḵati. Nawiitka tlaska mamook kakwa, pi kwanisum mitlait tlaska peipa. Nanich:
iht man ankati nanich ukuk (ikta tanas ankati lshyun iaka mamuk-tsim) kopa kamlups wawa pipa, pi iaka chako saliks, pi iaka mamuk saliks pipa kopa naika
Kamloops Wawa #203 (December, 1902) page 185, column 1
Kakwa sumtaims naika wawa, per Ljun (okok liplet yaka mamook chinook-peipa) yaka kwanisum tiki chikmin pi heilo tilikum peiyei tlaska peipa. Iht man yaka nanich per Ljun kakwa-poos skookum-wawa kopa okok tilikum tlaska heilo peiyei tlaska peipa, pi yaka chako saliks. Per Ljun yaka wawa poos okok man ‘mamook-saliks-peipa’ kopa yaka. Tloosh tenas-wawa okok. Tl’onas tloosh poos nesaika mamook-neim kanawei kakwa peipa “saliks peipa”.
Iht wuẖt ‘saliks peipa’ nesaika mitlait ḵaẖ iht man skookum-wawa kopa per Ljun. Yaka wawa kakwa, okok man:
Ikta-mamook maika mamook-ts’um ẖuloima lalaang st’iwi’utl kopa okok peipa? Heilo naika tiki okok lalaang st’iwi’utl kopa naika peipa. Kopet Chinook naika tiki kopa naika peipa. Poos heilo maika kopet mamook-ts’um okok ẖuloima lalaang st’iwi’utl kopa peipa, tloosh maika kopet mash okok peipa kopa naika, pi kopa naika tloochman, pi kopa naika tenaas.
Kamloops Wawa #128, May 1895, page 69-70
Nawiitka tilikum tlaska haiyas-tiki chinook pi chinook-peipa. Pi sumtaims Ljun yaka mamook-ts’um shooshwap-wawa, tompson-wawa, etc. kopa Kamloops Wawa peipa, pi kopa okok ḵansiẖ tilikum tl’ap-sik-tumtum.
Pi kopa iht wuẖt peipa, iht man, Peter Kol yaka neim, yaka chako-haiyas-saliks pi mamook-peipa kopa Ljun. Nanich:
Kwanisum Peter yaka haiyoo-mamook-help tilikum chako-kumtuks chinook-peipa, pi heilo-ikta yaka tl’ap. Heilo tlaska patlach chikamin kopa yaka, heilo Ljun patlach chinook book kopa yaka. Kakwa, dleit yaka tl’ap-sik-tumtum pi yaka mamook okok peipa.
Tl’onas masaika nanich okok naika peipa pi wuẖt masaika chako-saliks. Poos kakwa masaika tumtum, tl’onas tloosh masaika mash saliks peipa kopa naika pi naika mamook-mitlait yakwaa kopa naika websait 🙂
Naika Aliks.
𛱁𛰆𛱇𛰅𛰜
The Kaltash Wawa 